Тропарь, глас 8-й
Зраки изобразуя святых на дщицах, сих благодеяния спешно, яко искусен художник, всехвальне Алипие, написовал еси на скрижалех твоего сердца и сего ради, аки образ, благолепне украшен, священства благодатию, аки златом, обложился еси от Христа Бога и Спаса душ наших.
Канон, глас 8-й
Песнь 1
Ирмос: Песнь возслем, людие, чудному Богу нашему, свободившему Израиля от работы, песнь победную поюще и вопиюще, поим Тебе, Единому Владыце.
Припев: Преподобне отче наш Алипие, моли Бога о нас.
Песнь возслати подаждь, Христе, помощь свыше рабом Твоим, да принесем от теплыя любве хваление в памяти угодника Твоего Тебе, Единому Владыце.
Преподобне отче наш Алипие, моли Бога о нас.
Благодати умножившейся, процветаше вера, и умножашеся полк преподобных на горе Печерстей, имже сообщник в житии хотя быти преподобный, прииде послужити Единому Христу и Владыце.
Преподобне отче наш Алипие, моли Бога о нас.
От юности твоея вдался еси родители своими, преподобне, в научение иконнаго писания, емуже усердно прилежа, написовал еси в сердце своем целомудрие и чистоту, яко от обоих был еси раб своему Владыце.
Слава: Чудное твое послушание дивнаго тя чудесе зрителя показа, отче, видел бо еси образ Владычицы, изображен нерукотворенне, и, от сего видения большею любовию к богомыслию разгоревся, сердце свое уготовлял еси, аки скрижаль, к написанию памяти о Христе Владыце.
И ныне: Скрижале, имущая Духом Святым написанный несказанно Образ Ипостаси Отчия, мое злообразие, Мати Дево, во благообразие благих деяний претвори, да отныне уготовлюся послужити Христу, Богу моему и Владыце.
Песнь 3
Ирмос: Несть свят, яко Господь, и несть праведен, яко Бог наш, Егоже поет вся тварь: несть праведен, паче Тебе, Господи.
Преподобне отче наш Алипие, моли Бога о нас.
Несть Тебе подобен в бозех, Христе, действом бо Твоего Пресвятаго Духа изобразил еси икону Матере Твоея нерукотворенне, и бысть чудо велие, емуже самовидец бе преподобный Твой, Господи.
Преподобне отче наш Алипие, моли Бога о нас.
Иже чудеса действоваше, Тойжде излете от уст иконы нерукотворенныя во образе голубинем, Егоже видев облетающа внутрь церкве, преподобный Твой, Христе, вся презре и ничтоже в мире сем возлюби, паче Тебе, Господи.
Преподобне отче наш Алипие, моли Бога о нас.
Образ славы Божия видев, преподобне, абие изменил еси мирский образ, быв черноризец, добре написуя добродетели изображение, еже и нам вообрази теплыми молитвами твоими.
Слава: От иконнаго художества своего, отче, навыкл еси духовныя детели воображати, добре бо убелив свиток сердца своего слезными потоки, написал еси памяти о Бозе помышление.
И ныне: Радуйся, свитче, Богоневестная Дево, на Немже перстом Божиим написася Отчее Слово, напиши на свитце сердца моего память Страшнаго суда и грядущими мучении удержи е от злых, молюся.
Господи, помилуй (трижды).
Седален, глас 4-й
Божия славы зрителя и иконнаго делателя премудра, кто с нами песньми тя не восхвалит, преподобне, видел бо еси от части чувственне Святаго Духа, – ныне же, предстоя Вышняго Престолу, не зерцалом, но лицем к лицу присносущную зриши славу Божию, еяже и мы да причастимся, отче Алипие, молитвами твоими.
Слава, и ныне: Предстательнице Святей Троице, предстани нам скоро, в днешний день собравшимся в храме Твоем пречестнем, и даждь славу преподобных Твоих зрети славящим Тя, Дево, молитвами Твоими.
Песнь 4
Ирмос: Из горы приосененныя, Слове, пророк, единыя Богородицы, хотяща воплотитися Боговидно усмотри и со страхом славословяше силу Твою.
Преподобне отче наш Алипие, моли Бога о нас.
Из горы призвал еси вслед Тебе тещи преподобнаго Твоего, Христе, тойже, мирския молвы отвергся, всею душею приложися Тебе и во уме изображаше присно силу Твою.
Преподобне отче наш Алипие, моли Бога о нас.
Яко светлая звезда, возсиял еси, отче, на горе Печерстей, добродетели бо от тебе, яко лучи, прострошася, блаженне, и освещают днесь тя величающих, темже и мы прославляем благодать твою.
Преподобне отче наш Алипие, моли Бога о нас.
Не мзды ради, но ревностию движим, прилежал еси делу своему и от сего во благолепие нещадно раздавал еси церквам Божиим, яко да вси, зряще на иконы твоя, в любовь Божию сердца своя обращают.
Слава: Добр делатель явился еси, блаженне, винограда Христова, яко свойственно Тебе со апостолом глаголати: не туне хлеб ядох, ибо руце мои мне и инем послужисте, темже приял еси от Бога динар и с благими рабы славу присносущную зриши.
И ныне: От чистаго сокровища чрева Твоего Динар явившая миру, искупила еси тем всех от первороднаго долга, Мати Божия, к Тебе прибегаю, искупи мя от мысленных заимодавец, да присно славлю благость Твою.
Песнь 5
Ирмос: Утренююще, вопием Ти: Господи, спаси ны, Ты бо еси Бог наш, разве Тебе, иного не вемы.
Преподобне отче наш Алипие, моли Бога о нас.
Утренюющих славословием к тебе от уныния возстави, отче, и от мрачных дел к свету богоразумия молитвами твоими возведи умы наша, скораго бо тебе на помощь поспешника знаем.
Преподобне отче наш Алипие, моли Бога о нас.
От дела руку твоею, отче, в честь Единаго Бога в тричастное отлучал еси разделение: иконному требованию, в монастырское делание и в милостыню нищим, и сим стяжал еси лучшее, присножелаемое рая селение.
Преподобне отче наш Алипие, моли Бога о нас.
День ручным деланием, нощь же бдением, молитвою и поклонением провождал еси всегда, блаженне, и тако, возложив руку на рало, управлен был еси в Царство Божие. Тамо помяни и нас ходатайством твоим к Богу.
Слава: Возсия солнце и виде твоя труды, святе, ибо смирение, нестяжание, чистоту, терпение, пост любовию ко всем растворял еси, и сим восхождением возшел еси на высоту богомыслия и Небеснаго дарования сподобился еси.
И ныне: Утро мысленное, произведшая в мир великое Солнце, озари наш ум и сердце и сыны Свету покажи ны, молимтися, Безневестная Дево, Ты бо еси просвещение и упование наше.
Песнь 6
Ирмос: Ризу мне подаждь светлу, одеяйся светом, яко ризою, Многомилостиве Христе Боже наш.
Преподобне отче наш Алипие, моли Бога о нас.
Ризу ангельскаго образа украсив шарами иноческих трудов, возшел еси на высокий степень священства советом наставника своего и, на том стоя, аки светило, светом твоих дел многих просветил еси.
Преподобне отче наш Алипие, моли Бога о нас.
Ризу Крещения окалявшему мне греха калом, даждь умиление, святе, молитвами твоими, да в нем испиру и чист явлюся лицу Божию: се бо предстою, песнословя хвалу твою бренными устнами.
Преподобне отче наш Алипие, моли Бога о нас.
Одежду священства приемь, по подобию Великаго Архиерея, Сына Божия, вшел еси, отче, во внутренняя завесы, приносити жертву Пожершемуся за грех всего мира, твоими молитвами ныне, аки жертвою, и о нас, святе, Творца умилостиви.
Слава: Одеян сый одеждею священства, больших дарований сподобился еси, яко и одеянных прокажением молитвами твоими исцелил еси, и нас, мысленне недугующих, сими исцели, молимтися, преблаженне.
И ныне: Уязвивших нас грехолюбия стрелою, уязви, Пречистая Дево, и побегнут, студом поражени, демонския полки, Ты бо еси бесом струп неисцельный.
Господи, помилуй (трижды). Слава, и ныне:
Кондак, глас 2-й
От юности Божественное в себе имея начертание, вдан был еси в научение иконнаго писания; и внегда небеси подобная Богородицы писашеся церковь, ты таможде пособствовал и видел еси Духа Святаго осияние, от Негоже приял еси чудес действо, яко иконы твоя чудотворяху, тем тя чтим и ублажаем, чудне Алипие.
Песнь 7
Ирмос: Отроцы еврейстии в пещи попраша пламень дерзновенно и на росу огнь преложиша, вопиюще: благословен еси, Господи Боже, во веки.
Преподобне отче наш Алипие, моли Бога о нас.
Детски играюща сумнением в вере праведно казнь Божия постиже, покры бо проказа лице его, сего ты, отче, исцелил еси и отыде, поя: благословен Бог отец наших.
Преподобне отче наш Алипие, моли Бога о нас.
Исповедавшему грех неверствия своего первее приложил еси, блаженне, покаяния пластырь, и, души исцелевшей, исцеле и лице помазанием вап твоих, и той о тебе воспет: благословен Бог отец наших.
Преподобне отче наш Алипие, моли Бога о нас.
Иже первее обоняния грехом острупився, по совету диаволю отчаяся спасения надежды. Се той паки, твоим, святе, учением к Богу обратився, исцелен бысть и, избыв обоих струпов, воззва: благословен Бог отец наших.
Слава: Твоим, преподобне, дивящеся чудесем многим, взываем согласно: радуйся, Елисее новый, неверующаго исцеливый от проказы, яко Неемана, и о тебе песнь отроческую воспет: благословен Бог отец наших.
И ныне: Безобразие души моея кто исправит, аще не Ты, Мати Божия, шарами благости Твоей тоя лице в благообразие претвориши? И, благолепие прием, воспою: радуйся, Образующая живописательне человеческий образ.
Песнь 8
Ирмос: На горе святей прославльшася и в купине огнем Приснодевы Моисеови тайну явльшаго, Господа пойте и превозносите во вся веки.
Преподобне отче наш Алипие, моли Бога о нас.
Яви тя, отче, всех Создатель на горе Печерстей доброцветущее ко исцелению древо, плоды бо твоих молитв всем к тебе приходящим подавал еси исцеление неоскудно, и отхождаху здравы, превозносяще Господа во веки.
Преподобне отче наш Алипие, моли Бога о нас.
Незлобие сердца твоего не лиши тя, преподобне, великих дарований, никогдаже бо огорчился еси на оскорбляющих тя, ниже воздал еси зло за зло, тем и прослави тя Христос зде и тамо во веки.
Преподобне отче наш Алипие, моли Бога о нас.
Сребролюбия омраченнии тьмою обличаху тя пред человеки, но Бог изведе, яко свет, правду твою и незлобие твое, яко полудне, ископавшии же тебе яму впадоша в ню, и студ их поминают вси во веки.
Слава: Седми даровании действуяй в Троице Единый Боже, изобразитися седмим иконам повелел еси нерукотворенне и явил еси преподобнаго, имущаго седмь Параклита Твоего даров, сия и нам подаждь, Всещедрый Царю, да превозносим Тя во веки.
И ныне: От всех дарований приемшая истканную ризу, рясны златыми одеяна предстала еси Троице Живоначальней. Стани убо, воздевши пречистеи руце Твои, и о нас, благотворения обнаженных, помолися, Ты бо еси, Пренепорочная, покрывающая грехи наша.
Песнь 9
Ирмос: Тя, Неискусобрачную Матерь Бога Вышняго, Тя, паче ума рождшую словом воистинну Бога, вышшую пречистых Сил, немолчными славословлении величаем.
Преподобне отче наш Алипие, моли Бога о нас.
Тя, отче, прославляющаго, прослави Бог, яко твоего писания иконам никогдаже огнь одолеваше, но пребываху целы от пожара невредимы, яже чудодеющия видяще, о тебе немолчно славословлении Христа величаем.
Преподобне отче наш Алипие, моли Бога о нас.
Отвсюду стекахуся людие видети преславное чудо, яко вся иныя пояде пламень огненный, твоегоже писания икон никакоже вреди. Еже и мы, слышаще чудодействующаго в тебе Бога, славословлении величаем.
Преподобне отче наш Алипие, моли Бога о нас.
Хранил еси незлобие и видел еси правоту, житие свое провождая во всяцей святыни, темже отвсюду Бог тя прославляше и изымаше от всякия напасти; сея и нас избави твоими молитвами, святе, да выну тя песньми величаем.
Слава: Радуется град Ростов, содержай икону, манием Божиим написану, и яко многоценным сокровищем искупуется от всех страстей, юже лобызающе, поминает, колико Бог действоваше тобою, блаженне. Сие чудодействие и мы днесь чтуще, удивляемся и славословлении величаем.
И ныне: Столп крепости имущие Тя, раби Твои, Богородице Дево, от лица враг наших гоними, к Тебе прибегаем и, припадающе, молимся: сохраняй нас, в бедах сущих, Ты бо еси столп нам крепок от лица вражия и стена необорима.
